Hvað er UTmessan og fyrir hverja er hún?
UTmessan er stærsta hátíð ársins fyrir öll sem hafa áhuga á tækni! Hún hefur verið haldin árlega síðan 2011 og sýnir hversu stór og fjölbreyttur tæknigeirinn er orðinn á Íslandi. UTmessan skiptist í ráðstefnudag fyrir fagfólk og opinn tæknidag fyrir almenning. Þar koma saman helstu tölvu- og tæknifyrirtæki landsins til að kynna nýjungar, vekja áhuga á tæknigeiranum og sýna hvað tæknin getur gert fyrir daglegt líf.
UTmessan leggur áherslu á að upplýsingatækni sé fyrir öll, óháð aldri, kyni eða bakgrunni. Tæknigeirinn býður upp á fjölbreytt tækifæri til náms og starfa.
Ráðstefnudagur – fyrir fagfólk og áhugafólk um upplýsingatækni:
Ráðstefnudagurinn er fyrir þau sem vinna við eða hafa sérstakan áhuga á upplýsingatækni. Þar koma sérfræðingar saman til að miðla þekkingu og reynslu og ræða nýjustu tækni, lausnir og þróun. Gestum gefst tækifæri til að sækja sér nýjar hugmyndir og mynda tengsl. Á sýningarsvæðinu geturðu hitt fulltrúa helstu tölvu- og tæknifyrirtækja landsins og kynnt þér nýjungar í geiranum.
Tæknidagur – fyrir okkur öll:
Tæknidagurinn er hátíð fyrir öll sem vilja kynnast tækninni og gera sér glaðan dag! Helstu tæknifyrirtæki landsins sýna hvað þau hafa fram að færa. Hér geturðu prófað nýjustu tækni, tekið þátt í leikjum og getraunum og fengið innblástur fyrir það sem framtíðin ber í skauti sér.
Aðgangur að tæknideginum er ókeypis og jafnt ungir sem aldnir eru hvattir til að mæta og upplifa töfra tækninnar. Engin sérþekking er nauðsynleg – forvitnin nægir!
Hvert er markmið UTmessunnar?
UTmessan vill vekja áhuga á tölvu- og tæknigreinum, tengja fræðin við atvinnulífið og sýna mikilvægi tækninnar á öllum sviðum lífsins. Markmiðið er að fleiri velji sér nám og störf í tæknigeiranum – því framtíðin er byggð á tækni.
Hver taka þátt?
Á sýningarsvæði UTmessunnar eru fyrirtæki sem leiða tölvu- og tæknigeirann, bæði á Íslandi og á alþjóðavettvangi. Fyrirtækin koma saman til að kynna starfsemi sína og sýna hversu fjölbreytt og spennandi störf í tæknigeiranum eru.
Hver stendur að UTmessunni?
Ský stendur að UTmessunni í samstarfi við Háskólann í Reykjavík og Háskóla Íslands.
Í undirbúningsnefnd eru:
Fyrir hönd Ský:
Arnheiður Guðmundsdóttir, framkvæmdastjóri UTmessunnar og Ský
Linda Björk Bergsveinsdóttir, verkefnastjóri hjá Ský
Samstarfsaðilar:
Háskólinn í Reykjavík
Háskóli Íslands
Upplýsingar til fjölmiðla:
Arnheiður Guðmundsdóttir
Hafðu samband við
Ský eru óháð félagasamtök þeirra sem vinna við eða hafa áhuga á upplýsingatækni. Félagið er rekið án hagnaðarmarkmiða ("non-profit") .
Upplýsingatæknimessan og UTmessan eru skráð vörumerki hjá Hugverkastofnunni og eru í eigu Skýrslutæknifélags Íslands. Öll notkun og vísun í vörumerkin er óheimil án sérstaks leyfis eiganda. Í því felst m.a. réttur sem settur er í vörumerkjalögum (sjá lög um vörumerki nr. 45/1997 með síðari breytingum) gefur eiganda vörumerkis einkarétt á að nota merkið hér á landi og getur hann þá bannað öðrum að nota í atvinnustarfsemi merki sem eru eins eða lík vörumerki hans. Nánari uppl: https://www.hugverk.is/trademark/v0087032